ایشیا کپ: شاہینوں نے بھارتی غرور خاک میں ملا دیا

لاہور:ایشیا کپ ٹی 20 کے سپر فور مرحلے کے اہم میچ میں سنسنی خیز مقابلے کے بعد شاہینوں نے بھارتی غرور خاک میں ملاتے ہوئے 5 وکٹ سے فتح اپنے نام کرلی۔دبئی کرکٹ سٹیڈیم میں کھیلے گئے میچ میں بھارت کی جانب سے روہت شرما اور قومی ٹیم کی طرف سے بابر اعظم کپتانی کے فرائض انجام دے رہے ہیں، پاکستان نے ٹاس جیت کر پہلے فیلڈنگ کا فیصلہ کیا تھا۔182 رنز ہدف کے تعاقب میں پاکستان کی جانب سے کپتان بابر اعظم اور محمد رضوان نے اننگز کا آغاز کیا، کپتان بابر اعظم 2 چوکوں کی مدد سے 10 گیندوں پر 14 رنز بناکر روی بشنوئی کی گیند پر روہت شرما کو کیچ دے بیٹھے، فخر زمان 2 چوکوں کی مدد سے 18 گیندوں پر 15 رنز بناکر چاہل کی گیند پر کوہلی کے ہاتھوں کیچ آؤٹ ہوگئے۔
محمد نواز کو اوپر بھیجنا بھارت کے لئے سرپرائز ثابت ہوا اور انہوں نے جارحانہ بلے بازی کا مظاہرہ کرتے ہوئے 2 چھکوں اور 6 چوکوں کی مدد سے 20 گیندوں پر 42 رنز کی اننگز کھیلی، تاہم وہ بھوونیشور کمار کو چھکا مارنے کی کوشش میں دیپک ہوڈا کو باؤنڈری لائن پر کیچ تھما بیٹھے۔محمد رضوان نے ایک مرتبہ پھر شاندار بلے بازی کا مظاہرہ کیا اور 2 چھکوں ، 6 چوکوں کی مدد سے 51 گیندوں پر 71 رنز بناکر ہاردیک پانڈیا کی گیند پر سوریا کمار یادیو کے ہاتھوں کیچ آؤٹ ہوگئے۔اس طرح پاکستان نے 19 اعشاریہ 5 اوورز میں 5 وکٹ کے نقصان پر 182 رنز کا ہدف پورا حاصل کرلیا، خوشدل شاہ اور افتخار احمد ناقابل شکست رہے۔
روایتی حریف کی جانب سے کے ایل راہول اور روہت شرما نے اننگز کا آغاز کیا جبکہ پاکستان کے نسیم شاہ نے پہلا اوور کرایا۔روہت شرما 2 چھکوں اور 3 چوکوں کی مدد سے 16 گیندوں پر 28 رنز بناکر حارث رؤف کی گیند پر خوشدل شاہ کے ہاتھوں کیچ آؤٹ ہوگئے، بھارتی بیٹر کے ایل راہول 2 چھکوں اور ایک چوکے کی مدد سے 20 گیندوں پر 28 رنز بناکر شاداب خان کی گیند پر محمد نواز کو کیچ دے بیٹھے، تیسرے آؤٹ ہونے والے بلے باز سوریا کمار یادیو تھے جو کہ 13 رنز بناکر محمد نواز کی گیند پر آصف علی کو کیچ دے گئے۔
رشبھ پنت 12 گیندوں پر 14 رنز بناکر شاداب خان کی گیند پر آصف علی کے ہاتھوں ہی کیچ آؤٹ ہوئے، ہاردیک پانڈیا بغیر کوئی رن بنائے محمد حسنین کی گیند پر محمد نواز کو کیچ دے کر پویلین لوٹ گئے۔ویرات کوہلی نے ایک مرتبہ پھر شاندار کارکردگی کا مظاہرہ کرتے ہوئے 1 چھکے اور 4 چوکوں کی مدد سے 44 گیندوں پر 60 رنز بنائے اور آصف علی کی تھرو پر رن آؤٹ ہوگئے، دیپک ہوڈا 16 سکور بناکر نسیم شاہ کا شکار بنے۔اس طرح بھارت نے مقررہ 20 اوورز میں 7 وکٹ کے نقصان پر 181 رنز بنائے۔
بھارت کے خلاف اہم میچ کے لئے پاکستان کی پلیئنگ الیون میں ایک تبدیلی کی گئی ہے، انجرڈ شاہنواز دھانی کی جگہ محمد حسنین کو موقع دیا گیا ہے۔دیگر کھلاڑیوں میں کپتان بابر اعظم، نائب کپتان شاداب خان، وکٹ کپر محمد رضوان، فخر زمان، افتخار احمد، خوشدل شاہ، آصف علی، محمد نواز، نسیم شاہ اور حارث رؤف شامل تھے۔
پاکستان کے خلاف میچ کے لئے بھارت کی پلیئنگ الیون میں کپتان روہت شرما، کے ایل راہول، ویرات کوہلی، سوریا کمار یادیو، رشبھ پنت، ہاردیک پانڈیا، یوزویندرا چاہل، روی بشنوئی، بھوونیشور کمار، ارشدیپ سنگھ اور دیپک ہوڈا شامل تھے۔یاد رہے کہ گروپ سٹیج پر بھارت نے دلچسپ مقابلے کے بعد پاکستان کیخلا ف میچ آخری اوور میں جیتا تھا۔قومی ٹیم 7 ستمبر کو افغانستان کیخلاف میچ کھیلے گی، فائنل 11 ستمبر کو سپر فور کی دو ٹاپ ٹیموں کے درمیان دبئی میں کھیلا جائے گا۔