خیبر پختونخوا بلدیاتی انتخابات، 13 اضلاع میں ری پولنگ، نتائج آنا شروع

پشاور: خیبر پختونخوا کے بلدیاتی انتخابات کے 13 اضلاع میں ری پولنگ کے نتائج آنا شروع ہوگئے ہیں جس میں غیر حتمی اور غیر سرکاری نتائج کے مطابق میئر پشاور کی نشست پر جے یو آئی کے زبیر علی نے پی ٹی آئی کے امیدوار کو شکست دے دی ہے۔
ری پولنگ الیکشن میں میئر پشاور کی نشست کے لئے جے یو آئی کے زبیر علی 6 پولنگ سٹیشنز سے اپنی برتری برقرار رکھتے ہوئے مزید 1030 ووٹ حاصل کرکے کامیاب ہوئے۔گذشتہ الیکشن میں زبیر علی نے 62 ہزار 388 ووٹ حاصل کئے تھے جبکہ ان کے مدمقابل پی ٹی آئی کے رضوان بنگش 50 ہزار 6 سو 59 ووٹ حاصل کئے تھے، ری الیکشن کے دوران زبیر علی نے برتری حاصل کی اور ان کے ووٹوں کی تعداد 63 ہزار 418 ہوگئی جبکہ رضوان بنگش 7 سو 36 ووٹ حاصل کرکے کل 51 ہزار 395 ووٹ حاصل کرنے میں کامیاب ہوئے۔قبل ازیں پشاور سمیت چارسدہ، نوشہرہ، خیبر، مہمند، مردان، کوہاٹ، کرک، بنوں، لکی مروت، ڈیرہ اسماعیل خان، بونیر اور باجوڑ میں مجموعی طور پر 500 سے زائد پولنگ سٹیشن قائم کیے گئے تھے۔ لوکل باڈی الیکشن میں سات لاکھ سے زائد ووٹر حق رائے دہی استعمال کریں گے، ڈیرہ اسماعیل خان میں میئر کی نشست کا انتخاب مرکز نگاہ ہے۔
الیکشن کے دوران بعض علاقوں سے دنگا فساد کی رپورٹس بھی ملیں۔ تحصیل کرک میں دبلی لواغر اور شگی لواغر کے خواتین کے بیلٹ باکسز کو آگ لگا دی گئی۔ذرائع کے مطابق برقع پوش نامعلوم خواتین نے ووٹ پول کے بہانے بیلٹ باکس میں آتش گیر مواد ڈال دیا جس سے بیلٹ باکس میں آگ لگ گئی، آگ لگنے کے بعد پولنگ سٹیشنز میں بھگدڑ مچ گئی، سٹاف اور خواتین پولنگ کے احاطے میں محصور ہوگئیں۔ پولیس اور سکیورٹی فورسز نے علاقے کا کنٹرول سنبھال کر حالات کو قابو کیا۔کندہ باجی خیل پولنگ سٹیشن پر مقامی لوگوں نے بائیکاٹ کر دیا اور تمام نشستوں پر ووٹنگ کا مطالبہ کر دیا۔ پشاور کے گل بہار قادر اباد پولنگ سٹیشن میں بھی ہنگامہ آرائی کی اطلاعات ملیں۔ری پولنگ میئرسٹی ، تحصیل چیئرمین، نیبرہڈ اورویلیج کونسل کی نشستوں پر ہو رہی ہے، انتخابات کے پہلے مرحلے میں پولنگ سٹیشنز پر توڑ پھوڑ، ہنگامہ آرائی اور امیدواروں کی وفات کے باعث پولنگ روک دی گئی تھی۔