شہباز گل پر فرد جرم عائد کرنے کی تاریخ مقرر

پاکستان تحریک انصاف کے رہنما شہباز گل پر فرد جرم عائد کرنے کی تاریخ مقرر کردی گئی۔
تفصیلات کے مطابق ڈسٹرکٹ اینڈ سیشن کورٹ اسلام آباد میں رہنما تحریک انصاف شہباز گل کے خلاف اداروں کو اکسانے اور بغاوت کے کیس کی سماعت ہوئی۔
شہباز گل عدالت میں پیش ہوئے جبکہ عماد یوسف کی جانب سے طبی بنیادوں پر استثنی کی درخواست دائر کی گئی۔ اسپیشل پراسیکیوٹر رضوان عباسی بھی عدالت میں پیش ہوئے۔
شہباز گل کے خلاف بلوچستان میں درج مقدمہ ختم کرنے کا حکم
شہباز گل نے عدالت سے کہا کہ آج کل بہت حساس کیسز چل رہے ہیں جس پر عدالت نے سوال کیا کہ کیا آپ کا کیس حساس نہیں ہے؟
شہباز گل نے عدالت سے استدعا کی کہ آج کل میں بہت خود کفیل ہوں کیسز میں کیونکہ ،لاہور ،پشاور اور کوئٹہ میں بھی کیسز کا سامنا کر رہا ہوں۔ پیٹرول کا ریٹ بہت زیادہ ہو گیا ہے تاریخ لمبی دے دیں۔
اسپیشل پراسیکیوٹر نے کہا کہ ہماری عدالت سے استدعا ہے کہ فرد جرم عائد کرنے کی کارروائی کا آغاز کیا جائے۔
بلوچستان پولیس نے شہباز گل کو طلب کرلیا
رہنما تحریک انصاف نے عدالت سے کہا کہ میرے کیس میں کڑوروں روپے خرچ کیے جا چکے ہیں ،میرے لاکھوں روپے لگ چکے ہیں جس پر عدالت نے کہا کہ آپ کا اسپیشل پراسیکیوٹر پر اعتراض ہے تو وہ اپر فورم پر چل رہا ہے۔
شہباز گل نے عدالت سے کہا کہ رانا ثناءاللہ صاحب کی مثال موجود ہے جن پر تین سال تک فرد جرم عائد نہیں ہو سکی تھی جس پر عدالت انہیں ایسی بات کرنے سے روکتے ہوئے محتاط رہنے کی ہدایت کی۔
عدالت نے 11 فروری کی تاریخ ملزمان پر فرد جرم عائد کرنے کے لیے مقرر کر دی۔